تغيير الدستور في الثورة

هو انتم بجد شايفين أن تغيير الدستور أو إسقاط المادة التانية اللي بتتكلموا عليها دي هيعدي مرور الكرام كدا؟ انا كواحدة مسلمة متربية ف الغرب ومدارس غربية مش إسلامية وسيبت الغرب بسبب القرف اللي لقيته هناك ورجعت بلدي عشان أحس أني في دولة مسلمة وأحس بانتمائي مستعدة اموت ولا إن المادة التانية تتلغي والمفروض اني متعلمة احسن تعليم و open minded وصوفية حتي يعني ضد التطرف والوهابية تماما

حضرتك متصور إن باقي الشعب هيسكت مثلا؟ انتم عايشين في عالم مثالي من الأوهام، انا عائشة ف زايد وكل صحابي ضد الفكرة دي أصلا، محدش ف يوم من الايام حابب يشوف اتنين ولاد بيببوسوا بعض ف الشارع، ده أنا لما صدقت هربت منهم من أمريكا، والشعوب الغربية لما صدقت اليمين المتطرف بدأ يمسك عشان يخلصوا من القرف ده وحضرتك عايز تدخلنا ف الدوامة دي تاني؟!!! انتم بتهزروا بجد. الموضوع ده عمره ميعدي واعتقد اكتر من نص الشعب مستعد يموت ولا انه يعيش تحت التغييرات اللي حابين تعملوها دي.

الأقليات زي المسيحيين واليهود حقوقهم محفوظة كاملة من الشريعة الإسلامية واللي مش قادر يدور علي أول بحث علي جوجل عن ازاي الإسلام حافظ حقوقهم، يبعتلي وانا افهمه عادي.

بالنسبة ل"الملحدين"، الحمد لله، مشفتش ملحد مصري مش بيكره المسلمين كره العمي لحد دلوقتي إلا ما رحم ربي وانا ميفرقليش السبب في أي حاجة غير أن يبقي واحد زي ده عايش وسطنا وبيكرهني جدا، يعني تخيل اصوت لحقوق أقلية بتقول علي "ربي" انه Murderous, bigoted, pedophile? ده انا عمري مسمعتها من ملحد أجنبي مع اني عندي صحاب اجانب كتير ملحدين، مين المسلم العاقل اللي هيصوت ويرضي إن الناس دول يعيشوا وسطنا ويشتمونا ويشتموا في نبينا وربنا ومنقدرش نعملهم حاجة، كل الشعب عارف باللي حصل في السويد لما واحد حرق القرآن ومعمللهوش أي حاجة عشان حقوقه محفوظة، تفتكر الشعب هيوافق أن نفس الناس دول يبقي ليهم حقوق عندنا؟ Keep dreaming. احنا ملناش أي حقوق ولا أي احترام ف الدول الأجنبية، مستعدين نموت قبل ما نسمح أن ميبقاش لينا ولاعتقاداتنا احترام ف دولنا.