مبدأيا كدا, انا مهندس مدني شغال في سوق البرمجيات من 2017. اتخرجت و دخلت
iti
و من مشروع التخرج و انا كنت بحاول ادخل المجال اللي انا فيه.

شغلي معظمه علي سوفتوير هندسي و ثلاثي الابعاد سواء علي الويب او ديسكتوب او علي منصات مختلفة و APIs

اشتغلت في مصر 3 سنين و بعد كدا اشتغل برا مصر سنة و بعد كدا ريموت سنتين كمان الشغل كله مع اوروبيين و امريكان.

خد مني شوية نصايح عشان في ناس كتير بتسأل هنا او بعتتلي شات عن الموضوع دا:

1- تأكد تماما, ان اللي منجحش في مصر مش هاينجح برا. و اللي مكانش بيعافر في مصر مش هاينجح برا بردوا. بالذات مستقبلا, في قوانين كتير في الهجرة بتتغير و الاحوال بتتغير و بتترسم لمنع اكبر عدد ممكن عن السفر للبلاد الغربية و حاليا كمان بنشوف بوادر الكلام دا في البلاد الخليجية. فتأكد تماما ان مجرد انك تكتب بوست هنا ترضي ضميرك "ممكن شغل يا جدعان" او "اخد كورس ابو هدهود او الزيرو منين ولا ايه رايكم فيه" مش هيأكلك عيش ولا هايعمل حاجة.

2- البرمجة عايزة وقت و مجهود. لازم تتجاوز الفكرة دي و تعترف بيها قبل ما تضيع من عمرك شوية سنين بتجري ورا سراب و ينتهي بيك الحال في شركة تحت بير سلم بتديك 8000 ولا 9000 جنيه من هنا لسنة 2030 و لما تقولهم عايز مرتب اعلي تقولك في غيرك كتير و تساومك بالطرد.

3- الفشل في البرمجة مش معناه انك متكملش او تكمل شغلك القديم و خلاص, لا. الفشل ممكن انك تخش شركتين تلاتة و تغرز و ماتعرفش تترقي او تطلع لفوق تاني و تفضل بتلف في الزون بتاعت الميد ليفل و الجنيور لحد ما تطرد لان سنك كبر.

4- السوق العالمي بيفرق معاه شهادة و السن علي فكرة. بس مش مشكلة اوي لو انت هاتبدأ.

5- تبدأ ازاي؟ للناس اللي ملهاش دخول
ITI
تخش علي كورس
CS50x
و تخلصه للاخر كله. بعد كدا تمسك بلاي ليست
ITI
اللي علي اليوتيوب و تشوف انت عايز مجال ايه و تذاكر البلاي ليست بتاعته, بعد كدا تشترك علي
pluralsight
او تجيب المحتوي بتاعه و هو موجود علي النت يعني و تذاكر اكتر في المجال اللي انت عايزه و تمسك
stack
معينة لو ويب. خلصت الكلام دا؟ اعمل موقع محترم من الاول للاخر و نزله علي
github
و افهم
git
كويس. او ابلكيشن ايا كانت اللي انت بتعملها

خلصت الكلام دا؟ قدم علي شغل و فترة تقديم الشغل كمل لحد ما يجيلك اول شغلانة. غالبا هاتبقا اي كلام بس عافر فيها و خلاص.

خلصت كل دا؟ تمام انت كدا لسا مبتدتش اصلا في المجال. حضرتك هتاخد بعضك و تخش علي محتوي
MIT open courseware
و تبدا تذاكر من هناك الاساسيات بضمير, و معاهم كورسين من جامعة
UC Berkley
بتوع الكمبيوتر اركتيكتشر.

خلصت الكلام دا؟ قدم في شغل اكبر من اللي انت فيه. اتقبلت؟ تمام سنتين و قدم ريموت و متشتغلش غير بالدولار بس.

القصة دي هتاخد من 3 لحد 5 سنين شغل و تعب و مذاكرة. بس النتيجة بتاعتها انك هاتكون برنس زمانك.

6- تبدأ ازاي؟ لو انت ليك ITI
خشها و لما تطلع هاتشتغل اول شغلانة اسهل من لو انت مدخلتهاش, و بعد كدا كمل الاساسيات زي ما قلتلك فوق.

تكلفة الكلام دا؟ صفر جنيه مصري. لا هدهود و لا زيرو و لا كامل الوزير و لا اي حاجة تانية انت محتاجها. بس ذاكر ذاكر ذاكر و بطل علو*ية.

7- يعم ميتينك يعني ايه اللي هايحصل لو انا معملتش كل دا؟
هاتشتغل في شركة و تنط للميد ليفل بعد كدا تعطل في مشاكل محتاجة معلومات عن الكمبيوتر سيستمز و كودك هايطلع منظره مقرف و بطيئ و المشاكل اللي هتقابلها في الداتابيز مثلا هاتبينك انك حمار وسط اخواتك. و بالتبعية هاتبدا تخاف من المشاكل في الكود و تبدا تحس انه مش مجالك و تبدا تحس انك غريب, و بالتبعية المديريين هياخدوا بالهم و هايفشخولك المرتب و انت هتاخد انطباع انك مش كويس و هاتفضل ماسك في الشغلانة لحد ما تبور خالص و يبقا عندك 35 سنة و خبرتك لا تتعدي شخص عنده 25 سنة. و ساعتها القاعدة في البيت قادمة لا محال. خصوصا ان اصلا كل الشركات المصرية بتاعت البرمجيات النهاردة مستواها كحيان جدا فخلاص سقف المرتب المصري هايقفل عليك, الشاطر بيشتغل ريموت او بيسافر. بس لازم تبقا شاطر الاول.

انت شفت الكلام دا؟ اه و بشوفه و شوفته و لسا هاشوفه.

8- طب انا مبداتش خالص و معرفش انجليزي و معرفش اعمل جوجل سيرش و الكلام اللي انت كاتبه دا؟ معلش اتعلم بقا من غير انجليزي متشتغلش في البرمجة اصلا.

9- انا متشتت الحقني انا مش عارف ابدا اصلا.. ببدا كورس مهندس هدهود و بعد كدا ببطله و اقف. او بقعد ادور علي احسن و افشخ كورس ممكن الواحد ياخده في حياته. اعمل ايه؟ ذاكر يا معلم و بطل علو*ية.

10- ممكن شغل فريلانس او ريموت من غير خبرة والنبي؟ لا مش ممكن و لو لقيت و خليته نشاطك الاساسي غلط. سقفك واطي و هاتوصل لمستوي مش هاتكبر عنه. الا لو انت من الواحد في المليون اللي هايجيله ناس كتير من غير سبب و تشغل معك ناس احسن منك تعمل الشغل و ساعتها انت مش مبرمج انت بروكر.

11- ممكن شغل لو سمحت؟ ريديت معلهوش فرص شغل تجاوز الامر. ا