اغلب البنات اللي بكلمهم لما بسألهم عن تفضيلاتهم بتقول انها بتفضل الشخص الطويل بمعنى طويل وسط الرجالة مش اطول منها بس، يعني حتى لو هي 150 بتقول 180 سم مثلا. انا مش طويل ولكن فيه بنات كتير طولي او اقصر حاجة بسيطة. انا مش بقابل مشكلة مع البنات بالرغم من اني مش طويل، ولكن بخاف البنت تعجب بيا عشان باقي المميزات وبرضه بفضل عندها شعور نقص وانها تعمل مقارنات بين شخص لشخص لو كان الطول حاجة مهمة اوي بالنسبالها زي بعض البنات. انا الموضوع مش مسببلي ازمة زي ما وضحت. انا بس عايز افهم انه هل ده المتوقع من اغلب البنات حتى لو هما طولي او اقصر حاجة بسيطة، لازم يكونوا شايفين انه ديه نقطة مثلا تفضيل او انها بتتنازل عن شىء معين قصاد حاجة تانية؟ يعني لو مكنش فيه المميزات التانية كان ممكن متتقبلش الشكل؟. انا شكلي كملامح وسيم ولون العين والخ. او النوع اللي بنات كتير ممكن تتنجذب له، وجانب الشخصية والعقلية بيتقالي دايما اني عقليتي مختلفة لاني بحب اقرأ عن حاجات جديدة وعن ال psychology وسياسة وكورة، وعلاقات وغيره. ولكن انا عايز اعرف انه هل لازم اكون بالمميزات ديه بالنسبالها؟ ووقتها هيكون انها كأنها بتتغاضى عن الطول وكأنه عيب مع انها اصلا ف طولي او اقصر

شعور انه واحدة تعجب بيا جدا وبعدها بفترة تفكر في موضوع الطول ده ممكن يكون غريب لانه بنات كتير بتكون مش متأكدة من مشاعرها ولكن فيما بعد ممكن ترجع تاخد الموضوع عذر. فهل دايما اللي هتتقبل الموضوع هيكون هي اصلا مش شايفة نفسها حلوة؟ فهتكون بتقول مش بيفرق معاها؟ هل فيه بنت بتكون شايفة نفسها حلوة وبيكون عادي؟ لانه بحس انه بياخدوا الموضوع كماعيير مجتمعية انه طالما هي شكلها حلو يبقى تاخد حد كامل من ناحية المعايير المجتمعية. خصوصا انه حتى البنت اللي متوسطة او اقل من متوسطة الجمال برضه احيانا بتفضل الطويل حتى لو قصيرة. انا طولي تقريبا 167-168 سم. حابب اسمع اراءكم ومن البنات بالتحديد.